(( ظلّ اهناك ))
شعر – كاظم العطشان / بغداد
ظل اهناك ..
ظل ابعيد ….
اصوملّك صبر كل عام
وفطر شوگ إلك كل عيد
يكفيني الحضن بالطيف
هُوَّه ال من يصحله الطيف چا شيريد !
يكفيني…
ونه المفطوم من زغري اعله ثدي الاووف
ثاري الاوف مثل الشوف .. هم تعويد !
ظل اهناك ….. ظل ابعيد
يكفيني امن اشم عطرك وگول افّيش
والتذّ ابطواريك
هوى اعذيبي ومخدّة ريش
مولازم حصاد اچفوف
أفرعَك بالحلم چم ليش
وبلّل صبختك مِزنه
اشتريد احسبه مزنة عوز … زلّة طيش
لو شهگة خريف وطاحت الورگه
لو چوية وسم نيشان
دگ شذر الوسم فرگه
يوين انته ..؟!
سرَح بيّه الخيال اوياك طول ابطول
وزرع بالحلم ملگه
چا گتلي حلم بالگيظ غير العطش ماتلگه
چا گتلي الوداع اغروب يكتل واهس الشبگه
ياحنّة ضريح الروح….
يانسمه يفي صفصاف
ظل اهناك
ظل اهناك
مرات التحبه ابعيد بس مثل الگمر ينشاف
أو يِصِح وجه الشمس شبرين بس تنعاف
ونته ابكل مغيب اوياي حية بيت
تطوّه اعله خصر الليل ساف او ساف
ظل اهناك
من ديوان سفر دخان
